Finale Schriefwedstried in Deelden

Wo 09-03-2016

DELDEN - Deensdagoawend 29 meart organiseert ’n Kreenk vuur de Twentse Sproak nen Twentsen verhalen- en gedichtenoawend in restaurant ‘t Hoogspel, Bornsestroat 1 in Deelden. ’t Begeent um 20.00 uur en is de finale van de schriefwedstried oawer het thema Aait Verdan. Juryvuurzitter is verhalenverteller Ben Kleissen. Van de inzendingen is een book emaakt dat ’s oawends ook zal worden presenteerd en gratis is vuur de schriewers. Nöast verhalen is der dizze ronde ook experimenteerd met Japanse dichtvormen as haiku en senryu.

Der is een mooi programma maakt van de inzendingen. De schrievers en schriefsters dee hiervuur in anmoarking komt, kriegt nog een verzeuk um eur eagen schriefsel vuur te leazen. Ook wordt bekeand maakt wee der in de priezen vaalt. A’j lid van ’n Kreenk zeent ma’j der gratis in. A’j gin lid zeent mer wal lid weelt worden, ma’j der ook vuur niks in. Nit-leden betaalt 3 euro intree en doar zit dan wal ne komme koffie biej in.

* Vuurofgoand an ’n verhalenoawend is der vuur de leden de jaarvergadering den begeent um 19.00 uur en is oeterlijk 19.50 uur of-elop. De joarstukke van ‘n penningmeaster, ‘n agenda en het joarverslag kö’j vuurof inkieken. Ze lignt vanof 18.45 uur trechte op de toafels. Penningmeaster Harry Groener is noa tien joar oftreadend en nit herkiesboar. Kandidaten köant zich meelden tot deensdag 29 meart biej het bestuur.